Home

10 Dec 2006

أو تسريح بإحسـان







كل علاقة تجمع ما بين الزوجين المفترض انها قائمة على الحب والتفاهم والإتفاق كذلك ، وتبدأ كل علاقة مابين الرجل والمرأة بالإتجاه إلى الإنسجام في المشاعر والأفكار حتى نصل إلى مرحلة نكون فيها قد تجاوزنا مرحلة الإنساجم الى مرحلة الميانة والإنكشاف التام على الطرف الآخر .

أي ان كل شخص قد عرف الآخر بكل سلبياته وإيجابياته وعيوبه وحسناته وهي تعتبر أخطر مرحلة ما بعد الزواج لأن كل طرف سوف يعبر عن رأيه بالآخر بدون مجاملات فترة الخطوبة ( الملجة ) أو المرحلة التي تسبق الزواج والتي تأخذ طابع رومانسي حالم وبعيد عن الواقيعه أحياناً وكل شخص فيها يجمل نفسه للآخر ويظهر أجمل مالديه في شخصيته حتى وان كانت ( مقتبسة ) ه



هنا سوف تبرز الفروقات والتباينات مابين الطرفين لم تكن ظاهرة من قبل وعليه أيضاً لن يكون هُناك مجال للتغيير من أجل عيون الزوج أو الزوجة فلربما قد مرت سنوات كثيرة وأصبح يوجد أطفال فيما بينهم مما يستدعي قبول كل من الزواج والزوجة للآخر كما هو عليه .

وإلا فإن الحياة الزوجية ستأخذ منحى آخر ينحدر سريعاً إلى البرود أو قد تصل أحياناً الى طريق مسدود فيتم الإنفصال او الطلاق..


ما جعلني أفكر في هذا الموضوع هو شخص لا أعرفه معرفة شخصية لكنها معرفة عمل حديثه وبطبعي الذي لا يحتك كثيراً بالموظفين تحت مسمى الزمالة ( يعني قاعده بمكتبي كافية خيري شري اللي يبيني يجيني ههههه) اتاني للمكتب ودار بيننا حديث وبطبيعتنا نُبادر للسؤال عن الحال والأهل فجائت إجابته مفاجأة لي ( بالرغم من كونها عادية ) :

ماني بخير .. تعبان والله وضايق خلقي
افااا يبو فلان خير عسى ماشر
صاكّة فيني الدنيا
ان ضاقت الدنيا سعة السما ورب السما موجودة
خذوهم مني..
منو اللي خذوهم منك ؟
اعيالي... خذوهم مني (
كان عندي خبر قبل فترة انه بينه وبين طليقته مشاكل وواصله للمحاكم )
لاحول ولا قوة إلا بالله العلي العظيم..
إي والله
اترسوا مخ اعيالي عليّ..
خذوهم وخلا علي البيت .. كانوا مونسيني وخصوصا البنات
الله كريم يابوفلان...جان أسكت(
ويييي قمييضه عااد كلش ما أعبر على السيمباثي اللي عندي انا وراسي ..ما أعرف أواسي فاا كل إجاباتي مختصرة ومقتبضة )

والله جان أشوف الريال سكت ورد قال : عن إذنج اشوي أثاريه خانقته العبره وااعليه اشوي ويبجي جان يفز ويقوم بسرعه .... كسر خاطري المسكين


بعدما خرج من مكتبي تذكرت الآية الكريمة في سورة البقرة ( فإمساك بمعروف أو تسريح بإحسان ) واستغربت من كيفية تطبيق مفهوم التفارق ما بين الزوجين بالحسنى ..وأين ذهبت سنوات العشرة والأطفال الذين يجمعون فيما بينهم وأسألة كثيرة دارت في بالي ..

قصة تحضرني ... عن التسريح بالإحسان

طلّق رجل امرأته أرادت الارتحال قال لها : اسمعي وليسمع من حضر إني والله اعتمدتك برغبة ، وعاشرتك بمحبة ، ولم أجد منك زلّة ، ولم يدخلني عنك ملة ، ولكن القضاء كان غالباً . فأجابته المرأة : جُزيتَ من صاحبٍ ومصحوب خيراً ، فما استقللتُ خيرك ، ولا شكوتُ ضرك ، ولا تمنيتُ غيرَك ، ولا أجد لكَ في الرجال شبيهاً ، وليس لقضاءِ الله مَدفَع ، ولا من حكمه علينا ممنع .

وكان الله غفوراً رحيما .... شماله المحاكم ؟؟


امممممممممم

14 comments:

طائر بلا وطن said...

الله يعين .. اكيد قضاء و قدر بس مرات وايد
يكون السبب الاختيار الخاطئ و النظرة القاصرة
اللي تتجواز أشياء مهمة تخدم العلاقة و الاسرة
ككل عشان احساس لحظة او تفكير محدود يعتقد
ان العلاقة ما راح تكبر و لا راح تتعدى المطاعم
و الغزل و احلام البدايات


تصدقين يا نون و من تجارب بسيطة و ملاحظات
مهمة عن تجارب تصير حواليني و خاصة من اللي
اسمعه من قلم جاف بحكم طبيعة عمله و شي قاعد
يشوفه كل يوم

عندي قناعة تامة ان الصراحة و المكاشفة
تكون من البداية حتى على الاشياء اللي
نعتقد انها تافهة

مو شرط الدفاشة بس باختصار لازم كل طرف
يقول "هذا انا" بطريقة لبقة و تنم عن احترام
و من ثم تأتي مسألة الرضى و كل شي قسمه و نصيب


نقطة ثانية

العيال شنو ذنبهم؟ و بالاضافة الى الحرمان
العاطفي قاعد يشوهون صورة احد والدينه
في عينه .. الانسان اللي يفترض يكون القدوة

هذه طامة ثانية تضاف لطامة الحرمان
و كل شي بيتراكم و يتكدس بنفسية الطفل
و يمكن تطلع عقدة باكر تنعكس على اسرته
او حياته بشكل عام

:

تسريح باحسان!!ا

نادر جدا
:/

سوري على القرقة

نون النساء said...

سوء الإختيار..
شلون الإنسان المُقبل على الزواج
راح ايعرف ان اختياره ممكن يتبعه نتايج سيئة إذا كان مافي مصارحه من البداية
المرحلة اللي تسبق الزواج تكون أغلبها مجاملات...
لا ياربي كلها حتى مو أغلبها..

والحقيقة والعيوب والسلبيات تبدأ تظهر
والتمثال والمثاليات اللي فيه قبل الزواج بدى تظهر عليه عيوب..

بس اهني لازم يكون الزوجين انفسهم واعين
لهالنقطه وهي التقبل التام لسلبيات هالإنسان..

واذا مافي تقبل راح تبدا المشاكل
صغيرة وبعدين تكبر
طبعاً أنا ما أقصد سليية توصل لحد الجناية مثل زوج يسكر أو عنيف



شي غريب يعني
المشاكل اللي اسمعها من أجل الحصول على الطلاق..

ومرات أشياء غريبة عجيبة تحصل

!!!!!!!!!!!!!!!!!!!!!!!!

Q8ya said...

كل شيء بالدنيا نصيب وحكمة من الله سبحانه وتعالى وفي نفس الوقت خيرة...:)


بالنسبة للطلاق لازم يكون مبني على التفاهم والمودة واهم شيء احترام العشرة اللي كانت ما بينهم


بس وين اللي يسمع خخخخخخخ


قليل قليييييييييييل جدا ...:)


يالله الحمد لله الدنيا ليلحين بخيييييييييير والله يكون بعون زميلج...:)

mishari said...

يا نون
شتقولين من صجج شوفى المحاكم وشوفى المصايب اللى فيها
بعض الحريم صار عندهم الطلاق متعة
انها تمسح بكرامة الزوج
وتلعب بالدتيا لعب
لكن شتقولين ضعف اخلاقى
وقبله دينى فى مجتمع اختفت فيه ابسط معانى الانسانية

kitty said...

شقولج يا نون النساء
ماهى بهالبساطه
ومو كل الناس مثلى ومثلج
بلاوى يشيب منها الراس نسمعها من المحاكم فى امور الطلاق والحضانه

كلامج صحيح
والى يخاف ربه يسويه
والاغلبيه وحوش
جنهم داشين حلبه معركه

الله يصلح ويهدى النفوس
امين

Jeff said...

So what is it about, Nonny? Don't work hard, just a hint, two or three words.

Divorce or parents' fighting and how it hurts the kids? Or what?

neelaah said...

اوووووه يا نون اسمع قصص
مثيرة و مقززه

عن امهات يقولون كلام سئ عن الاباء لأولادهم

عن سرقات اطفال من بوابات المدارس

عن تعليم الاطفال الكذب

الكثير
احيانا يتحول الطلاق الى حرب شخصيه بي الطرفين
تعمي كل منهم
عن مصلحه الاطفال


اتفق معاج
الف بالميه
الطلاق لازم يكون حضاري

Mamloo7a Q8ia said...

الزواج والطلاق قدر مكتوب
لكن المشكله في الزوجين وتصرفاتهم بعد الطلاق
كل واحد يحاول ينتقم من الثاني بأي طريقه
ويبدأ كل واحد منهم بنشر غسيل الثاني بدون ادنى اعتبار لاولادهم او اذا كانوا بدون اولاد لاي عشره بينهم
للاسف
وليش ما نفترق واحنا احباب واصدقاء ونرضى بالمقدر والمكتوب ونتمنى الخير لبعض شنو اللي يمنع

Cr8ivia said...

ايه والله يانون .. مادري ليش يوصولن الامور لهذي الدونيه !! سواءا مره او ريال ..

يعني شتو بتستفيد اهيه اذا حرمت عيالها من ابوهم؟ و اغلب الاحيان تكون اعناد بس لا اكثر و لا اقل !!

اعرف واحد ماشاء الله عليه سنع و ملتزم و ولد ناس .. تزوج وحده زواج اهل و خطوبه اسبوع و ملجه بسرعه لان كان بيسافر .. ماعرفها عدل
و على طوووول حملت ..
المهم .. الريال ملتزم و بار باهله .. ماقدر يعيش وياها .. البنت فري وايد و حاول بكل الطرق ايرها صوبه باللين بالشده ماتبي ! .. ماديه جدا .. لدرجه ان الولد متعود يتصل على امه يوميا او يوم و ترك .. سوت له سالفة شطولها شعرضها انت شوف معاشك جم بيزه و مقصر علينا و اذا قتلك قلت ماعندي و لما نرد الديره و هالحجي و نص معاشك رايحه على مكالمات العيوز!
المهم تفاقمت المشاكل .. عنده ياهلين .. طلقها

16 الف قضيه سوتها
الريال ملتزم بدفع مصاريف عياله و النفقه و كل شي .. لااا رفعت قضيه !! تبي التسليم يكون موثق و و مادري شقالت تخاف يغدر!

طبعا خذت اليهال و تبلت عليه بلاوي سوده .. صار مو مسموح له يشوفهم الا كل خميس العصر و ببيت ابوها بس حتى ما يوطوط فيهم السكه !
اليهال لي شافوه يبجون بجي يبونه ! بس ما باليد حيله !!

قضيه ثالثه تبي خدامه و سايق مع ان يتفاااجأ ان القضيه مرفوعه حتى محد قاله او طلب !!

قضيه ثالثه تبي بيت او أجار للعيال !!

مع انها تدري ان هذا شي فوق طاقته و قاعد يوفره غصب .. هد بعثته و رد الكويت يشتغل بسبتها!

الحين انخطبت و تبي تتزوج .. اي خلي العيال ياخذهم لاااا مستحيل .. تبي تخليهم عند امها!!

ليش كل هذا؟ عناد !! طلقني و انا بعز شبابي و خلا الكل يتشمت فيني !!

الله المستعان!

نون النساء said...

q8ya :

آمنا بالقدر وآمنا بالنصيب
لكن تتحول عملية الطلاق إلى نشر غسيل
وحرب بشعة تستخدم فيها كل مايخطر على بالك من أسلحة حتى لو وصلت الى الطعن بالأخلاقيات..

شي كبير كبير



.
.
.

mishari :

اممممممم
ذكرتيني ببنت كانت تدرس معاي
قبل ثلاث سنوات
أرملة ماكملت 21 سنة زوجها اتوفى بحادث سيارة قبل لاتنولد بنته
كانت تسولفلي
ان أهل زوجها علشان ياخذون حضانة البنت بعد ماكبرت اطعنوها في شرفها وانها انسانه هايتة وتمشي مع شباب

أدري الموضوع ماله علاقة بالطلاق
لكنه يندرج تحت بند
" أسوي كل شي علشان أرضي غروري"
وأخي هالأدمي يتشرشح بالمحاكم
والمشكلة انا طاقتني البوهه
اقولها حلفاي
والله صج؟؟
اكيد اتقصين علينا
ههههههههههه عبالي بس بالمسلسلات الفجر سعيدية

:/


.
.


kitty :

لا صج صج كيتي
والله استغربت وايد
شوفي حلات الطلاق اللي مرت علي
أغلبها كانت لصديقات طفولة اوكي
اعمارهم مابين 20 الى 25 سنة
اوكي صج كان في مشاكل بس ما اوصلت محاكم وسب وقضايا وبلاوي زرقة
كنت بس أقرا بالجريدة شغلات جذي أول مرة بحياتي أقابل شخص حي يرزق جدامي يمر بنفس الظروف
حراام
:""(

نون النساء said...

jeff :

mmmmmmm, i'm talking about divorce
Some couples when they reach the stage of divorce, the process turns into a war to destroy the other party or reprisal.

And directing the dirtiest charges vanities only to feel that we destroyed the other party ?? forgetting many years that they live together & may be they have children ??

this is so weird ..

there is a chapter in Quran talks about divorce & the provisions of divorce starting from the rights of both of them , ending with there children if they have children ..$ non of it talks about fighting & telling bad things to take a right for the woman or the man who wants to divorce.


& i've put a story for a man used to work in our company talking with me about his kid's & how his x-wife take them from him by telling things about him ( he was going to cry ) wondering why did she do that ??

:""""(

that was so sad..


.
.
.

neelah :

مثل ما حصل مع الأخ اللذي ذكرته بالبوست..

استخدام الأطفال كأسلحة ضد الزوج
حرام نترس عقول الأطفال بالكذب
وضد منو أبائهم؟؟ منأجل مصالح شخصية

أحياناً ودي لو يحطون منهج ويدرج في المدارس ويسمونه

التربية الزوجيه

بدال مادة الإقتصاد المنزلي الفاشلة
ويكون فيها تربية للرجل والمرأة في فترة المراهقه على شيء

اسمه طلاق حضاري
مو من نوع


ينيلك يابن بهية والنبي حوديك في ستين داهيه..



.
.


مملوحة كويتية :

العناد ومايسوي
وعلى قولة المثل
أخذته العزة بالإثم



.
.
.

critivia :

تدرين اكو واحد
مو راضي يعترف بابنه من طليقته
واللي طلقها واهي حامل بالشهر الرابع
بس علشان يقهرها ويكسر خشمها


( اولده عمره اذا مو غلطانه
ثلاث مادري اربع سنوات الحين
مو حراج هلون ؟؟

Kuw_Son said...

تدرين لو هذا الحوار اللي دار بين الزوجين كان بيني و بين زوجتي .. والله ما أطلق !!
وين هالزوجة اللي تقول جذي حق زوجها !!؟؟ هذا وأهم مقبلين على انفصال .. كل واحد يمدح الثاني !!؟؟

AGeNT WD-40 said...

نون
مشكوره على هالبوست و الظاهر انج هوستي عالجرح شوي و الصدى واضح من الردود.
خلونا نحلل تحليل بسيط المشاكل من وين تيي:
1. الوازع الديني
2. اخلاق الزوج \ الزوجه
3. الخلفيةالعقليه بالتعامل مع المشاكل للطرفين
4. اهل الطرفين "في ناس بالعصر الحجري إلى اليوم"
5. عدم الأعتماد على النفس بالجيل الحالي بالذات.

اعتقد الحالات اللي انذكرت ما تطلع من النقاط الذكوره إذا وافقتوني

عندي حاله ان زوج طلب من زوجته توقيع ورقه تنازل عن حقوقها الشرعيه بعد الطلاق و المطالبه بالأطفال.

مادري وين قاعدين!! ليش ما يبيع زوجه مع الأثاث المستعمل بعد !

انا بعرف عيال بلي شتيشن و مارينا باجر إذا تزوجو شنو بيسوون


tx
ِAGeNT WD-40

نون النساء said...

kuw-son :

ماكوو طبعاً

:/

على طاري هالموضوع أمس كنت
اطالع حلقة كلام نواعم
وتناولو قضية طلاق زوجين بسبب عدم توافق النسب..
الزوجين تم طلاقهم غصباً عنهم واللي فسخ عقد الزواج إخوان الزوجة
بالرغم من زواجها لاكثر من سبع سنوات ويوجد اطفال بينهم
بالأخير تم إلقاء القبض عليهم بتهمة الخلوة وانسجنوا واطلعو بكفالة
الزوجة ارفضت تطلع من السجن إلا لبيت زوجها اللي طلقوها منه غصبا عليها

الإتصال مابينهم مقطوع حالياً
الزوج تحدث عن اللي حصل معاه وبكى من الحاصل..

واستغربت فعلاً فعلاً
شلون يقوم قاضي بتطليق زوجين بدون رضاهم..

هاذي وحده من عجايب الطلاق
واللي خرجت لنا كقصة لأحدى حلقات طاش ماطاش
.
.
.

AGeNT WD-40 :

لأن اللي قاعد يصير شي مو طبيعي
الطلاق صار كأداة إنتقام مو حل لعلاقة غير ناجحة

:/
ألحين انا اذا مقهورة من ريلي أروح اشرشحه وألعن خيره بالمحاكم؟؟
ليش يا فلانة؟؟
علشان يتأدب
ولا عشان تتأدب


فلانة تقط اعيالها على ابوهم
مع ان الحضانة عندها

ليش يا فلانة سويتي جذي هذولخ اعيالج؟؟

ليش ابوهم ما يصرف عليهم
كافي انا اعابل فيهم

لاحول ولا قوة الا بالله
انزين اعيالج هذول مو خلاجين تحذفينهم مني ومناك

:/

حمدالله والشكر