Home

27 Sep 2008

صلاة الحريم بالمسيد




الله اكبر

لو سمحتي اختي ... يابنت روحي منيّه ... سارة تعالي اكو مكان... سسسسسس ....سسسسسسسس....
 ههههه ( ضحكة عالخفيف تأتي من الصفوف الخلفية )....واااااااااااااااااااااااااااء وااااااااااااااااااااااااااااااااااااااء وااااااااااااااااااااااااااااااااااااااء

سمع الله لمن حمد

سسسسس.....سسسسسس.سسسسسسسس آآتشوووووو.... كحكحكحكحكح...آآآتتتتتششووووووووو

الله اكبر

ثنتين يخطرون فوق راسج وانتي ساجده

الله اكبر


نفسهم الثنتين يخطرون فوق راسج يبون يردون مكانهم


سسسسسسسس...سسسسسسسسس وااااااااااااااااااااااء وااااااااااااااااااااااااااااااااااااااااااااااااااء ( وحده يايبه البيبي )

سندر راسي طول الصلاة يبجي ...

وكح كحكحكح.....آآآآتشوووو


السلام عليكم ورحمة الله ...
 السلام عليكم ورحمة الله


 ما امدانا خلصنا الركعة
وكل ثنتين حطو روسهم بروس بعض وسوالف وسوااااااااااالف  وسوااااااااااالف لا تنتهي




اقوم بييبلي ماي ... واطالع الحريمات ويا بناتهم

- وحده فل ميك أب ويايه كاشخه على سنقة عشرة

- الثانية وايد بالهون بس خاطة كحلتها ( عجيبة كحلتها مو سايحه عاد استحيت على ويهي وما سألتها أي ماركة بس كنت بمووووت بعرف شنووو وليش ما تسيح اشمعنى أنا
 )

- وحده يايه تبرق من فوق لي تحت من  الشوارفسكي

- أخيييييييييييييه على صبغة الأظافر

طبعا غير اللي تركع نص ونص عشان لا يطيح قوطي البرنجلز اللي معلق براسها



مت من القهر وأرد مكاني ألتفت حق منى : اقول منى انا باجر بييب معاي دله قهوة وشاي وانتي عليج صحن الحلو  ..
المرا غشت ضحك ....

 وانا عند ربي صاجة

ترا فعلاً انتوا يالحريم مو مال مساجد
قعدو ببيوتكم وايد ابرك لكم

ماكو فايدة


الله اكبر

واغمض عيوني عشان اركز
أبي اخشع لو اشوي بس

ونطلع من المسيد
وبقلبي حلطومة عوووووده




عسى ربي يرحمنا برحمته ويغفر لنا
ويعتقنا من النار ويجعلنا من اهل الجنة 
آمين 

22 Sep 2008

الغزو الإيراني الغاشم



رأيت فيما يراه النائم :

اني كنت نازلة في شاطيء مع مجموعة حريم كلهم لابسين عباية راس والشاطيء كان مصكر وينزلونله بدرج ، المهم وكانت وحده لابسة روب أبيض ( مال الدكاترة ) وكانت تشرحلنا عن المفاعلات النووية الإيرانية , وكانت تشرح بسرعه بسرعه وخايفة وقالت لنا ان المكان اهني خطر وممكن تنفجر هالمفاعلات بأي وقت ، المهم ولا بالصوب الثاني من البحر شفت شي بالسما يشبه غيمة الفطر ( نفسها الغيمة المشهورة مالت القنبلة النووية على اليابان بالضبط ) اهني قالت لنا اللي كانت لابسة الروب ان لازم تنخشون بمكان صاد عشان لا يحوشنا الهوا اللي فيه الإشعاع وكان في يمنا انابيب صرف مياه امطار كل انبوب يدشه ثلاث اوادم بالغين بعض حريم دشو فيه انا رحت وراهم وقعدت وغطيت اذوني ونزلت راسي بوضعيه الخطر اللي علمونا اياها ايام المتوسطة . وصار مثل الريح الشديدة وسمعت صوت وحده تبجي ورفعت راسي ولا وحده ريولها كأنها احترقت جان اناديها تعالي تعالي لا تخلين الريح اتحوشج المهم خفت الريح وطلعنا ولا انشوف جنود قاعدين يضحكون علينا ولبسهم لبس جيش طايح حظه ولونه زيتي غامج وكانو يتكلمون عربي مكسّر .. الحريم كلهم راحوا بيصعدون الدرج اللي بيطلعهم من هالشاطيء وانا رحت معاهم وهذيله الجنود يتطنزون .. مت من القهر منهم وقلت إلا اصورهم بتلفوني وافضحهم جان ارد لمكاني اللي قعدت فيه وسويت روحي أبي ادور تلفوني وانا قصدي اصورهم جان اييلي واحد منهم وسألني بالعربي المكسر شتسوين ..؟؟ قلتلة أدور تلفوني جان يمسكني من شعري ويردّد كلمتي .. وضحك واحد منهم كان ماسك استكانة شاي ولا يكتها على رقبتي حرقني ملعون الخير .. واقعدوا يضحكون جان يقوللي بما معناه : يلا روحي ولا تردين انا طلعت الدرج جان اقعد اصورهم وانا طالعه .

يوم صعدت كان كل شي معفوس فوق حدر ... كنت اشوف الناس لابسين ملابس سجن والدنيا ظلمة وشكلنا كان مغبّر المهم ولا اشوف نفسي بمكان كله بنات وكأننا سجناء حرب وكانت وحده مسؤوله عنا وكانت متعاطفة ويانا جان تقوللي : حرام توكم شباب ويصير فيكم جذي ...المهم ولا يدش عسكري علينا واهيه ارتبكت وقعد يسألها عنا وشنو انسوي :واذا كان في وحده اتسوي شغب قولي لنا احنا نتصرف وياها .. جان تقوله ان كل شي اوكي .. وكنت اشوف الناس تركض ما تدري وين تروح على غير هدى ومادري من شنو ينحاشون والجنود هذيله ماسكين وبالسوط على اي واحد منّا .


بالحلم ان اللي كانت مسئولة عن سجن البنات هربتني وقدرت انحاش بس الجنود اقعدوا يلحقوني ... ووصلت بمكان بجبل كان فيه ناس مقاومة يوم شفتهم جان اقولهم ترا الجنود لاحقيني واعتقد يمكن شافوني لما دشيت هالمكان جان يقومون وياخذون معاهم جناط صغيرة وقالولي : يلا بسرعه لا تقعدين اهني .. ونطوا على طوفة صغيرة كانت عبارة عن ممر داخل الجبل هذا ( اتوقع كان جبل لانه اشبه بممر صخري لما دشيته ) وانا قعدت احاول اروح معاهم ما قدرت إلا بطلعة الروح انط على هالطوفة .. واااي قطيييعة حلم كله مراكض تعبت .... وقعدت من النووم أبي ماااي بس صيااام ..




14 Sep 2008

العب لي يا ورق الحماما


سامري بصوت سليمة اسماعيل

كنت أغنيها حق اخواني ..بس أداء سليمه فيها عجيييييييب احلا من اللحن اللي خبري ..


جيته يلوحي
فوق السطوحي
عمري وروحي
والعب لي ياورق الحماما
العب لي بليل الظلاما



جيته بالليوان
والحوش مليان
كله اصبيان
والعب لي ياورق الحماما
العب لي بليل الظلاما




وجيته يتوضا
وابريجه فضه
ليت من يعضه
والعب لي ياورق الحماما
العب لي بليل الظلاما




جيته بالدهريز
ينقش أباريــــز
شيخ المواليف
والعب لي ياورق الحماما
العب لي بليل الظلاما









على فكرة بالبحرين معروفة بلحن غير واسمها آه يا سلمان :)
للأسف حست النت بس مو محصلتها إلا يو تيوب


جيته يلوحي
فوق السطوحي
عقلي وروحي هالولد
اه ياسلمان


ياليل دانه ياليل دانه
مكحول العيان محمد
واه ياسلمان


جيته في داره
ينقش حباري
شيخ الزباره عيني
واه يا سلمان


ياليل دانه ياليل دانه
مكحول الاعيان راشد
واه ياسلمان

جيته في الليوان
والحوش مليان
كله صبيان عيني
واه يا سلمان


سالم يا سالم ياسالم
اه ياسلمان
مكحول الاعيان سالم
اه ياسلمان

جيته في الدهليز
ينقش اباريز
شيخ المواليف عيني
اه ياسلمان



استمتعوا

2 Sep 2008

باللي ما يحبك

الله يكملك بثوب العافية يارب
وما تشوف شر يالغالي..

:""(

هذا الظاهر من كثر ما اسولف اني بطبخ