Home

30 Apr 2006

plz .. سحبوا مني الليسن




لا صج صج ما اتغشمر أنا
ياجماعا أحد يسحب مني الليسن

ترا من صجي أنا خطر هادّيني بالشوارع جذي
مو خايفين على نفسكم؟
موخايفين على اعيالكم؟


هاااااااااو انزين قلنا حريم يسوقون بس
عااااااااااااد مو نفسي جذي

إنا لله وإنا إليه لراجعون


اليوم طالعه من مستشفى العدان بروح
طريج الملك فهد طبعا أكو إشارتين

وانا مقصدي الإشارة الثانيه علشان أنزل من الجسر
بإتجاه الأحمدي عرفتو شلون

من الذكاااء الخااااااارق اللي فيني
نزلت من الإشارة الأولى * اهي اساسا حق اللي يصعدون الجسر
بيروحون صوب العدان

وانا اقووووووووول ياربي الريال لف فوق تحت
وانا كملت يسار.. ياربي انا حاسة أن اكو شي غلط بالموضوع

يوم اطالع الإشارة الأرضيه ولا السهم قاعد يؤشر صوبي

@@ هاااااااااااااااااااااااااااااااااو أثاريني عكس السير
ياااااااااااااامالج الماحي .. يا حلاتني والله قاعده استقبل القادمين

ولا جيب صاعد الجسر لوووووووول جان يدش يمين المسكين اتوقع
ألحين طاقته البوهه يقول هاذي وين يايه ؟

جان أرد وراه على طول أدش باللفه اللي قبل الإشارة
أشوى ماكان في أحد صاعد الجسر

ولا جان ألحين أنا بالصفحة الأخيرة
حاطين النعي مالي


:"""""""""""(

إي والله الألم والحسرة تعتصر قلبي
اتذكرت يوم صكوني مخالفة بالسوق
وأنا معصبة على الشرطي مسوية فيها راعية حق
وليش وماليش تعطيني مخالفة ؟

ماشية عكس السير إختي

جان انجعم واستحي على ويهي
وبنت عمي تكركر

أول مارديت البيت صورتني بنت العم المخلصة
الخالصة المستخلصة المتخلخصة لي مع مخالفتي
صورة تذكارية .


الله ياخذ مادة الفلسفة وعلم النفس
هاذي أثارها الجانبيه على الطلبة توها بدت تطلع

بس بس حلاص فيني بجية صراحتن

27 Apr 2006

SMS 3


.
.
.


تَعَالَ وَنَمْ في قَلْبي لا عَدِمْتُ هَوَاكَ

فَكَم غَريِقاً لِلهَوى فِيهِ مَاقَدْ سَبَحَـا



تَعَالَ واجْمَـعْ مَنِّي مَاقَـدْ حَانَ قِطَافُهُُ

فَرَبيعُ العُمْرِِ آنَ أَوَانُهُ وَوَرْدُهُ طَرَحَا



لَمْ أَعُدْ أَخْشَى أُنَاساً أَجْني مَلامَتَهُمْ

فَحُبُّكَ كُشِفَ سِتْرُهُ بَيْنَهَمْ وَانْفَضَحَا


.
.
.



Non

25 Apr 2006

يا ملوك الطوائف



يا ملوك الطوائف

مسلمين سنة وشيعة
أقباط مسيحين
يهود
أيا كان

.
.

إهداء لكم

.
.


يستطيع العودُ المُغَمًّسُ بالكِبريت **
إحراقَ غابةٍ .. ويح نفسِهْ !
أوَ يَدري العُودُ الموَرِّثُ ناراً ..
أنها أولاً تَشُبُّ برأسهْ ؟
!




:)










** ابراهيم الأسود

23 Apr 2006

شكو ماكو




اللي خلاني اتذكر هالسالفه أول امس يايبين طاري بطل الواقعه اللي صارت

كككككككك... فتذكرت مرة عقب ماطلعنا الهدة "
ثالثة ابتدائي بسنة التسعين "

ولا باصنا اللي يوصلنا البيت مبنجر
أنا :
حميد شصاير ؟
حميد : ما شايفاا البااص مبنشيييييير..
أنا:
انزين اشلون الحين بنرد البيت
وقعدت أتحلطم ... لان منظر البياّاعات اللي مبسطيم جدام باب المدرسة وايد مغري
ولا راعي البرّد..
وأنا ماعندي فلوس
يووووه شي يحطم صراحة ...ويوعانه

المهم بما اني قررت ان بيتنا قريب قلت إني أرد البيت مشي
واهو صاير بقطعه وبيتنا بقطعه
بس اللقافه وما اتسوي

وعزّمت ومشيت وشلت جنطتي ومريت من عند الشارع

كان ساكن فيه خال ابوي الله يرحمه

المهم ولا أشوف اعيال خال ابوي



واحد بكبري والثاني أكبر مني بسنة قاعدين عند باب بيتهم حزة القايلة

عاد أحمدوه هذا كان من بد كل اخوانه أشقر

لووووووووووول وكنت كله اتحرش فيه


وكنا يالبنات
نغني عليه أغنيه مالها معنى ولا منطق
مادري من وين يايبينها ..

المهم يوم شفته اطلعو قروني
قلت اتحرش...شسويييي ضايق خلقي

وبريحاتي على هالدرب مامن ونيسه


جان أقعد أغنيها... وعلى فكرة مجرد إني أغني عليه هالغناية

كان مخاطرة بحد ذاتها وممكن أرووح فيها


جان أوقف بعيد عنهم اشوي وقعدت أبدّع :


حمرر تششششششششششششششش
ضيّع بيضاته في العشششششششش
حمرر تششششششششششششششش
ضيّع بيضاته في العشششششششش


اهني الولد قام يناقز من القهر جان يقعد يحذفني بالصخر أهو

وأخوه....<<<
انزين انته شكووووووو

انا شفت الوضع صار خطر عليّ
والوقت حزت قايلة وابروحي @@
لا يبه يبيله نحشه pucca5.gif (2850 bytes)
واطلقت لقدماي الرياح بعد ما يبيلها ياروح مابعدك روح
لو يقضبوني والله ما أرد البيت سليمة
لووووووووووووووول

ابروحهم الله يهداهم اهم واعيال عمهم ما يواطنوني
بعيشة الله وكل ما شافوني طاحو فيني
تجعّم ومرات توصل يمدون إيدهم لووووووول
,ونقعد نتهاوش ويموتون قهر اذا ما بجيت


والله طفولتي معذبة


.
.


في أحد أيام الصيف واللاهوب يحرق على أصوله
كانو اهلي طبعا مقفلين عليّ باب البيت علشان لا أهرّب
واهم نياام وأسوي مشاكل مني ولا مناك

المهم ولا يرن التلفون جان اشيله :

حنون : نوووووووووووووون حريقه حريقه لا يطوووفج
أنا : هااااااا..
شنووو وين وين ؟
حنون : بالبيت اللي ورانا نوووون حريجة يلا بسرعه تعالي
انا : اشلون اطلع ؟؟ مقفلين على الباب ..

حنون : طوط طوط طوط طوط طوط

يه سدته... اشلوون الحين انا ابي اشوف الحريقه
ما يصير حنانوه الطويلة اتشوفها وانا لأ


مالقيت غير حل واحد اني اتسلق عمود المظلة وأصعد الى سطح ديوانية الجيران
لأن المنظر من هناك كان استراتيجي حده وموقع
الحريجة واااضح جدامي



اشلون صعدت عاد هاذي حركات
مادري شلون كنت اسويها قبل


أوتش أخ حاارة تحرق...
<<< السطح كان حاار يحرق
وانا ما شاء الله علي صعدت حافية


طبعا ريلي استوت من الحرورة وماقمت أحس فيها
وقعدت اتفرج وماسكة النباطه مالتي وأحذف على الدخان
ايلين ما ذاب راسي من الشمس .... وبديت اتملل ابروحي
والسالفه صارت بايخة
جان انزل وحطيت راسي ونمت
تعبت وانا واقفه اطالع لووووووووووووول

طلعت السالفه محترق مطبخهم . ومحد تأذى


عمي الله يرحمه كان يعصب علينا إذا شاف وحده من البنات تبي تصعد المظلة

علشان تنط على سطح الديوانية هاذي
حتى أذكر مرة انصادت بنت عمي جان يربطها بالحبل
... وخلاها مربوطة على العمود نفسه اللي نصعد منه

المسكينة مالها ذنب أهي حدها حدها توقف واتطالعني
لانها كانت بطبوطه

هههههههه أنواع الطنازة عااد


لا تقولولي حرااام ياهل ولا طفولة معذبة
والله لو يربطونّه بسلاسل ماراح اعترض ألحين
صراحة كنا لا نُطاق

.
.
.



ذكرتني A7la Eng

بسالفة .. لان قبل لما كنت أمصخها بطلباتي

ابوي أو أمي يقولولي انتي مو بنتنا انتي بنت حسنين الزبّال


وااااي يا أنا... كنت أبجي لما يقولولي جذي

أهمه يقولونها يضحكون بس مايدرون عن

تأثيرها السلبي والنفسي على الطفل " اللي اهوه انا "


وأقعد أقوله : لأ.. أصلا انته ابوي انته اتقص علي

يقوللي : اشفيج انا مو أبوج حتى روحي سألي امج

اروح أسأل امي : يمه انا بنت منو ؟

تقوللي انتي بنت حسنين الزبّال


انزيين ياربي اجبروا بخاطري قولو بنت حسنين الشرطي مثلاً

بس عاد مو زبال

وأقعد أطقها بجوة وأحاول اقنعهم أن أنا بنتهم
ههههههههههههههههههههههههه


وليما الحين مستمرة سالفة هالحسنين
مو راضي يفج ... ايلين صراحتن قمت أشك
بنفسي بما اني ما اشبه احد من اهلي


:/


.
.




16 Apr 2006

في وطني



في وطني


.
.



" زيف اجتماعي "

فِي وَطَنِي .. نَرْهَنُ أَحْلامَنَا الصَّغِيرَاتْ...!!

لِنَتَجَّمَلَ بِأَحْلامٍ أَكْبَرَ مِنْ مَقَاسَاتِنَا..!!

نُخَبِّأُ الفَقْرَ تَحْتَََ الوِسَادَة ..

مَخَافَةَ أَنْ يَرَاهُ الجَارُ الأَكْثَرَ فَقْراً.. وَنَنَامْ ..

دَاعينَ الله أَلا يَقُظَّ مَضْجَعَنَا كَابُوسُ .. " السَّدَادْ "..



" حادث مرور "

لَنْ أَتَزَوَّجْ..وَلَنْ أُنْجِبَ أَطْفاَلاً..

أُشْعِلُ مِنْ رُوحِي شَمْعَةً.. لأنِيرَ دُرُوبَهُمْ..!!

لِيَفْجَعْنِي بِهِمْ حَادِثْ مُروُرْ ..

فَالمَوْتُ فِي وَطَنِي أِسْمُهُ..." شُارِعْ "




" بورصة "

فِي وَطَنِي..

التَّاجِرُ الذَّي يَتَجَوّّلْ عَلَى أَبْوَابِ الكَادِحِينَ نَهَاراً

يُقَايِضُ عَرَقَ السَّنَوَاتِ الذِي يُرَطِّبُ جِبَاهَهُمْ..بِالْوَهْمْ..

يَعُودُ ..

دَوْماً يَعُوُد مِنْ النَّافِذَةِ .. .. لَيْلاً

لِيَسْرِقَ حَتَّى وَهْمَهُ الَّذِي قَايَضَ بِهِ.. وَيُغَادِرُ البِلاَدْ..

.

.

أَيُّهَا الأغْبِيَاءْ ...

لِمَ لا تُغْلِقُونَ النَّافِذَة ؟؟!..




" وطنٌ يُنسى "

فِي وَطَنِي ..

وَطَنٌ يُستَنْزَفْ..وَلا يَشْكُو..

فِي وَطَنِي ..

وَطَنٌ يَبْحَثُ عَنْ نَفْسِهِ.. فِي أَبْنَاءٍ يَفْقِدُونَ الذَّاكِرَة

فِي وَطَنِي ..

وَطَنٌ تَسْقُطُ مِنْ عَيْنَيْهِ دَمْعَةٌ ..

فِي وَطَنِي ..

وَ

طَـ

ـنٌ

.. يُنْسَى ..!!

.

.

أَيْنَ الخَطَأ ؟؟




" ولا تقل لهما أفٍ "

عِنْدَمَا أَخَذَتْنِي مِنْهُمَا سَنَوَاتُ الشَّقَاوَة ِ..

وَالثَّوْرَة..!!

وَعِنْدَمَا أَعَادَتْنِي إِلَيْهِمَا سَنَوَاتُ العَقْلْ ..

وَبَدَأْتُ فِي اكْتِشَافِهِمَا مِنْ جَدِيدْ..!!

سَرَقَتْ اِمْرَأَةٌ أَبٍي ..!!

وَثَارَتْ أُمِّي..

.

.

.... : وَأَنْتِي ؟؟

.... :أَنَا ؟؟..

.... : ...........؟

.... : ...........!!



" أقنعة وطنية "

فِي وَطَنِي ..

أَصْبَحَتْ التَّيَارَاتُ السِّيَاسِيَّةِ كَبَائِعَاتِ الهَوَى ..

كَاسِيَاتٍ عَارِيَاتْ..

يَقِفْنَ عَلَى حَافَة ِالطَّرِيقْ ..

وَكُلُّ وَاحِدَةٍ مِنْهُنَّ تُرَوِّجُ لِنَفْسِهَا ..!!

.

.

وَوَطَنِي لا يُرَوِّجُ لَهُ إِلا حَنَاجِرُ التَّلامِيذْ

فِي صُرَاخِ الصَّبَاحْ تَحْتَ تَهْدِيدْ

العَصَا..!!




2 Apr 2006

Miss مضيعة all the time




معروف عني بين اهلي والصديقات اني


مضيعه أو دايخه


بس والله العظيم مو مني أنا

ما كنت جذي قبل اربع سنوات يه @@

ايه اللي حصل وايه اللي تغير مادري صراحتن

والحالة من سيء الى أسوأ ههههههه




تدرون ان عبالي ان مجمع شرق بالسالمية
كل هالسنوات وانا عبالي بالسالمية



تدرون ان مرة مديرنا طلب مني رقم فاست تلكو اذا اعرفه قلتله اي اعرفه
جان اكتبله رقم كنتاكي خخخخخخخ

احلى شي يوم دق عليهم احرجته المسكين.

بس والله مو مني الأرقام نفس الشي


كنتاكي : 888666
فاس تلكو : 886666

^
^
^
شنو ذنبي أنا

.
.

على طاري كنتاكي قبل فترة جذي اسبوعين الى ثلاث اسابيع
بدق على هارديز المهم ولا أدق واثقه من نفسي الريال حياني وسلم علي ومادري شنو قاللي
المهم قلتله لو سمحت أبي اثنين سانتافيه سبايسي وسط
قاللي : يافندم انتي طالبة كنتاكي حضرتك .
أنا طقتني البوهه : هاااااو انا داقة على هارديز مو كنتاكي
راعي المطعم : لأ يافندم شكلك غلطتي بالرقم .
أنا وفي قمة صدمتي واحراجي : آآآآآآنا اسفه خلاص مابي شي
راعي المطعم : طيب حضرتك اطلبي مش حتخسري حاجه
انا : لا مشكور انا أبي هارديز
راعي المطعم : مش عايزة تجربي مطافي الجديد ؟ ده سبايسي أوي كمان
أنا سمعت طاري السبايسي طاحت سعبولتي
اتذكرت صورته اللي معلقينها بالإعلانات مالوت الشارع
: قلتله : هاا اوكي خلاص

راعي المطعم : رقم التلفون ........... في ........ ئطعة ..شارع ...منزل..إاسم عدنان
أنا : هاااو @@ اشعرفك باسم اخوي انته وعنوانا ؟؟
راعي المطعم : ............................" مادري شكان قاعد يقول ما سمعته "
أنا : لأ بس يعني ترا انا ولا مرة طلبت من عندكم اشعرفك باسم اخوي والرقم يه ؟
راعي المطعم :..................." مادري شقاعد يقوللي "
أنا : هااااا... انزين جم الحساب
راعي المطعم : " نسيت صراحتن " و45 دقيقة وحيوصلك الطلب
أنا : مشكور

^
^

اطلعت مطاافي أي شي احرقتني على غير استمتااع
خلصت بطل بيبسي نص عائلي على نص السندويشه
ماقدرت اكملها


.
.


تدرون اني مرة سألني مديرناعن موعد رحلة اهو خله بياناتها عندي

ويالي يبي يتأكد مني اذا كانت اليوم ولا باجر انا بكل ثقة قلتله اليوم
قاللي : أكييييد ؟

قلتله : اي اي اكيد
وراح ينطر بالمطار ايلين ثنتين ونص الفير الريال ما وصل

شسالفه؟؟ جان يروح ويدق على الريال طلع للحينة قاعد بديرته

والطيارة باجر..

بس صج صج انحرجت حدي يومها خصوصا يوم قاللي

حسبي الله على ابليسج خليتيني قاعد بالمطار أنطر الريال كأني مرته

ماقدرت امسك نفسي عن الضحك..


صج مضيعه ..

.

.

تدرون اني مرة ضعت بخيطان .. انا بروح السالمية

اموت واعرف شنو اللي دخلني خيطان

اتوقع خيطان مادري وين دشيت صراحة لان اهناك كان كله هنادوة وصعايدة

وشاحنات كباااااااااااااااار حسيت نفسي بومبو بيناتهم ..

.
.


تدرون اني مرة ضعت داخل منطقتنا

كنا انا وامي رادين من عند وحده الساعه 11.30 ليلا

وكنت بسوي نفسي رامبو الخرايط وبطلع من طريق مختصر

هالطريق المختصر تميت أدور عليه ايلين الساعه 12.30 وانا افتر افتر

ابي اطلع من القطعه مو عارفه شلون

وامي الله يهداها قاعده تتحلطم : لايكون ضايعه؟؟ مااالت عليج وعلى اللي عطاج ليسن

واشتغلت امي علي...

انا : يمه والله أدل أدل بس قاعده افرفر فيج ماتبين اتشمين هوا ههههههههههه

امي : تزيد من تحلطمها ..انا من اول مابي أرد وياج وتزيد وتزيد

آخر شي لقيت المخرج وطلعت للشارع الرئيسي وردينا بيتنا سالمين


* الله يهداج يمه تكفين لا تتحلطمين لما اسوق اتوتر والله العظيم





.

..

تدرون ان مرة كنت بروح أزور وحده بالمستشفى اذكر

بفترة حرب تحرير العراق وبوابات المستشفى العسكري لازم تفتيش

المهم انا كنت توني عليمية بدقم السيارة خو بعد ما صارلي فترة مطلعة الليسن

قاللي العسكري افتحي الدبه ولا امر عليج اختي

انا قعدت اطقطق بالدقم..

مرة يتبطل السقف

مرة انطفى الليت مال السيارة وشغلته

مرة اشتغل التكييف

مرة اتبطلت الدريشة اللي ورى يه

اتوهقت انا وقمت اصب عرق

جان اطالعه وانا اضحك ومنحرجه


قلتله : اخوي ما أعرف وين دقمة الدبه صراحتن

العسكري ..مادري ليش احسه كتم ضحكت

T_T

جان يقوللي : توكلي اختي توكلي

قمة الإحراج
:"(

.
.

أما لهذه الإحراجات من آخر ؟؟

الوضع صاير لا يطاق هففففففففففففف

بنت عمي تقولي : انتي لو ماتكونين على هالحال

ماراح تكونين نون..


نسيت أقول شغلة البدليات بعد هاذي ابروحها مشكله ثانية مالها حل
وايضا طارئة
انا ماكنت اقط بدليات قبل


ياربي اكو أحد يغني الأغنية معكوسة



:"""""(